Heit steah ma do in tiefer Trauer, um Abschied va an Menschen zu nemma, dea an bedeutenden Teil va sein Leben insra Musig gewidmet hot.
Insgesamt gonze 66 Jahr war da Alexander Marksteiner, insa Wies Ax, aktiver Musikant va da Brandenberger Musig.
Da Ax is 1957 mit 16 Jahr auf da Posaune zu da Brandenberberger Musig kemma. Oa Jahr drauf is er donn bereits aufs Tenorhorn gwechselt, des er bis zu sein musikalischen Austritt bei ins nimma aus die Händ gebn hot. Mit dem Instrument hot da Ax donn 1960 a sein Weerdienst bei da Militärmusik Tirol geleistet, wos in da domoligen Zeit a gonz groaße Ehre fi an Musikanten gwesn is. Während seiner Zeit ois Polizist is er außadem zur Polizeimusig gonga, wo a viele Jahre fleißiges Mitglied gwesn is.
Wea an Ax kennt hot, woaß owa a, dass er nit kot am Instrument a wichtiger Bestandteil va insa Musig gwesn is. A gonz wichtiger Teil wor die Zeit, de er fi de musikalische Ausbildung fu die vü jungen MusikantInnen aufbrocht hot. Weiters wor er während seiner aktiven Zeit no ois Notenarchivar, Kapellmeister Stellvertreter und schlussendlich a fi oa Johr ois Kapellmeister tätig.
Und zum Noten Archivar hob i de Woch no a kloane Anekdote keascht. Da domolige Kapellmeister wor bei die Probn wias gsog hobn nit oiwei gonz bestens vorbereitet und hot öfter Stickä ugsog, dia insa Musig oafoch nit daspüht hot. Noch a poor Versuche is donn da Spruch kemma „geh Ax, tua hoit ebas grechts aussa“ und so hot oft ea eigentlich as Programm ausgsuacht, des insa Musig schlussendlich gspüht hot. Fi Noten hot da Alexander oiwei a Gspia kob. A spada ausse hot er no oiwei schiaga jedn Marsch auswendig gspüht.
Er hot natürlich a kritisch sei kinna. Des hobn mia jungen scho a no mitgriag. Wos a gornit gean megn hot, wor, wenn eba nit des gspüht hot, wos a die Noten inna gstondn is. Des dazuafarben oder oktavian hot eam gornit gfoin und des hot er da a gsog.
Während seiner Laufbahn hot er unzählige Ehrungen griag. I glab owa an meisten hotn gfreit, dass er 2009 zum Ehrenmitglied va da Brandenberger Musig ernannt woan is. I bin froah, dass ma hoia noamoi die Gelegenheit kob hobn, mit insan Ax sein 85. Geburtstog zfeiern. Am glänzen va seine Augn hot ma gsechn, dassn bis zum Schluss gfreit hot, wenn a da Brandenberger Musig zualosn darfn hot. Wenn er vielleicht bei a poor Töne a bissl sei Aug zuadruckt hot, is a trotzdem im Herzen bis zum Schluss a Teil va insra Musig gwesn.
Die Musik war fi di weit mehra wia a Hobby. Sie wor Teil va dein Leben. Durch die Musig host du vü Menschen Freid geschenkt und bleibende Spuren hinterlassen. Die Melodie, die du gespüht host, is etz vaklunga. Die Erinnerungen an di weascht oiwei bleibn. Mia donkn da fi dei Treue, dei Freundschaft und dein unermüdlichen Einsatz. Danke fi ois und wenn irgendwo an Himme a Musig spüht, donn bi i ma sicha, dass du bereits an Plotz in eanare Reihen gfundn host.
Lieber Alexander,
Ruhe in Frieden.
Ein letztes „Vergelt's Gott“ und ein letztes kameradschaftliches „Pfiat di“.
